GEGURITAN

Ambal Warsa Jurusanku

Dening: Mustaghfiri Hakim

Angin mangsa rendheng iki, aweh pemut marang sagung warga Praba wiyata tama

Ngosak-asik urut reroncene jantra laku pandadaraning dwija mring mahasiswa

Grapyak-sigrak, semarak beteke pingin miyak tumapaking ambal warsa

Pawiyatan luhur kang kawentar hamisuwur ing Semarang kene

Sing wis katon cumlorot gemebyar cahyane,

Arum mangambar-ambar gandane

Yuswa kang tambah muga saya dewasa

Bisa ngatonake gagah cakrak pideksa

Lamun wanita, esemmu nyata bisa nyundhul langiting pangrasa

Kuncuping kembang pawiyatan tan kendhat nyawang ing awang-awang

Mrih bisa tumandang numpang menang ing samubarang

Kabeh gumregah ora wegah, ora ulat wayah

Kabeh guru padha kemebul ngudhal ilmu kawasisan lan kanugran

Sengkut bikut katut tetese luh pangurbanan

Mrih tekane kasembadan lan kasunyatan

Ambal warsa iki, dadiya pralampita

Murih laras, lirih lan leres, ancas kang sinedya

Bisa pinter, bener lan pener kang tanpa mlumpat saka wewaler

Kasdu ngangkat drajat martabat utama

Ngudhal pawitan kapinteran, kaprigelan, kawicaksanan mayuta-yuta

Yen langit saya klawu

Yen suwasana sarwa kleru, jroning ati pengen udhu panemu

Papan pawiyatan kang wus moncer iki, ojo gampang kablithuk manthuk marga kahanan kang wis ora gathuk

Pawiyatan iki mung mligi kanggo ngudhal lan ngudi pakarti aji suci dudu papan kanggo ngobral janji

Muga warga Praba wiyata tama tansaha manembah mring Hyang Sukma, nyawiji panyuwuning tyas

Gusti ngijabahi